Si ce penzo, me grippo!
Te magnave na trippa,
appena ‘o juorno appriesso
ca me faciste fesso,

giuranno ‘a copp’’a mano:
“Sono vegetariano!”
…Accussì me diciste:
all’anema d’’o pallista!

A comme me veriste,
o vi’, t’annascunniste
aret’’a na vecchietta
Ma ‘a trippa i’’a verette!

Tu te faciste verde:
Vi’ che figura ‘e merda !
“Maronna, e mo che dico?
Aggiu perso n’amico!”

Penzaste pe tramente,
cu ‘a trippa mmiez’’e diente,
I dicette:”Coraggio;
‘o frate, nun m’arraggio:

è stata na bravata;
m’he ditto na strunzata,
nun sì vegetariano:
te magne pure ‘e cane!

Nun te ne fa n’ingrippo:
fernescete sta trippa,
ca i’ songo abituato
a ne sentì ‘e strunzate

d’’a gente c’annasconne
‘o fatta ca se sfonna
‘e lardo, nzogna, cotiche…
e po fà ‘a macrobiotica!

Annanza a me se vanta
(eeeh, nce ne stanno tante!)
“Io mangio assai leggero!”
me fa (Nu puorco intero,

frattaglie, raù, strutto…
Pensanno; “Chesto è tutto !”)
Di fronte a questi exploit,
che te vuo’ cchiù spanta?…

Perciò, statte sicuro,
‘o frate, magna pure:
fernisce sti stentine;
magna cu mme vicino,

ca i’ chiudo n’occhio, e overo
comme m’he ditto aiere,
si a tè te fa piacere,
cu tutto ‘o core ‘o credo

ca sì vegetariano!
Ce vedimmo dimane,
sincero amico mio!
(…Annanz’’a tripperia!)